SULIFFINNUT ATATILLUGU ANGALANERIT ILISIMASAQARLUARFIGAAGUT AQQUTAA TAMAAT TOQQISSISIMATISSAVATSIGIT AIR GREENLANDIP NUNATTALU ILAGAATIGUT

Kangerlussuarmi Camp Ice Cap-imi misigisassarsiornertalik

Kangerlussuarmi sap.ak. naanersiorneq, Camp Ice Cap-imi misigisassarsiornertalik

JUNIMI CORONAQARNERANI AKIKILLISAGAQ! Paasissutissat ataani takukkit.

Kangerlussuarmut ulluni sisamani angalanilli inuppassuit misigisinnaanngisaannik misiliissaatit: Tassa Sermersuarmi unnuineq! Tammaarsimaarfimmi sermiinnaasumi, tupermi ilisimasassarsiortut atortagaasa assingani unnuissaatit. Misigissassaq taanna nuannersoq meeqqanit inersimasunillu peqataaffigineqarsinnaavoq!

Danmakiliarnermi imaluunniit Danmarkimiit uternermi Kangerlussuaq inunnut amerlanernut akunniffiuinnartarpoq, nunaqarfimmilu tassani uninnganeq sivitsuleraangat anersaaruluttoqartaqaaq – tamannalu ajuusaarnarpoq. Mittarfimmummi ungasinngitsumi misigisassat aallartittarput. Tamannalu Kangerlussuup takornarianit nuannarineqarlualerneranut pissutinut ilaavoq.

Kangerlussuaq Kalaallit Nunaanni illoqarfituaavoq sinerissamiinngitsoq. Nunallu timaatungaani ilorpasissumiinnerup nassataanik sila unerisimasaqaaq. Tamannalumi aamma Amerikkamiut tassanerpiaq mittarfiliornerannut peqqutaavoq. Nunaqarfiullu iluani pisuttuaruit taamanernisat assigiinngitsorpassuit siumussavatit.

Angalanermut ilaapput tikilluaqqusilluni Restaurant Roklubbimi, inissisimalluartumi, nereqatigiinneq, aammattaaq takusassarsiortinneqassaatit ilaatigut nunap timaanut qeriuaannartumut umimmannik tuttunillu takusassaqarfiusumut.

Pisussat pingaarnerit!

  • Sermersuarmi unnuineq
  • Nunami kusanartumik avatangiisilimmi takusassarsiorneq
  • Umimmannik, tuttunik ukallinillu takusassarsiorneq
  • Restaurant Roklubben-imi tikilluaqqusilluni nereqatigiinneq

Angalanissamut ilaapput

  • Nuummiit Kangerlussuarmut s/u
  • Polar Lodge-mi imaluuni Old Camp-imi unnuinerit marluk (inini allanik uffarfeqateqarlunilu perusuersartarfilinni)
  • Ullut marluk atorlugit Camp Ice Cap-iliarneq, tassunga ilaallutik tupeq, sinngup puua aamma nerisassat (imeruersaatit ilaanngillat) Sermersuullu tungaanut angallassisulerluni biiliunneqarne
  • Tikilluaqqusilluni ataatsimiinneq
  • Bussinut ilaalluni takusassarsiorneq
  • Ullaakkorsiornerit
  • Roklubbimi tikilluaqqusilluni nereqatigiinneq
  • Nassatat 20 kilo namminerlu tigumiagassat 6 kilo
  • Akileraarutit akitsuutillu tamakkiisut, ulloq manna tikillugu Nunatta Angalatitsivianut paasissutissiissutaareersut
Ullormut pilersaarutit
Ulloq siulleq: Timmisartumik Nuummit Kangerlussualiarneq. Paasissutissiilluni ataatsimiinneq, takusassarsiorneq tikilluaqqussutitullu nereqatigiinneq

Nuummiit timmisartumik Kangerlussualiassaatit tikikkuillu nunaqarfimmi suleqatitta Polar Lodgemut imaluuni Old Camp-imut, inissinnissannut ikiussavaatit.

Angallassisulerluni takusassarsiorneq
Inissannut inissereeruit angalanermi peqataasut naapissavatit, tikilluaqqusissummillu ataatsimiitinneqassaasi. Tamatuma kingorna busserluni nunaqarfiup iluani takusassarsiortinneqassaasi, nunaqarfiup, ilisimariinngikkukku, ilisarilernissaa siunertaralugu. Kangerlussuup eqqaatalu oqaluttuassartaa oqaluttuarineqassaaq. Umimmaallu nujuartaammata, qanimut ungasianinngaanniillunniit takunissaat oqaatigiuminaappoq. Angallassisoq qinngusisassaaq, taamaattumik umimmannik, uumasunilluunniit nujuartanik allanik, takunissaq ilimanarpoq.

Restaurant Roklubbenimi tikilluaqqussutitut nereqatigiinneq
Unnukkut Restaurant Roklubbenimi tikilluaqqussutitut nereqatigiittoqassaaq. Roklubbi mittarfimmiit 5 kilometerinik ungasissusilik tatsip Lake Fergusonip sinaaniippoq.

Ullut aappaat: Sermersuarmut unnuiartorluni aallarneq

Sermersuup nunatta 80%-ia qalleqqavaa. Kangerlussuarmiit 30 kilometerinik ungasitsigaaq, avatangiiserlu kusanangaartoq aqqusaarlugu biilersuarnik immikkut sanaanik sermersualiaanneqassaasi.

Ullup qeqqata missaani aaneqassaatit angallassisullu misigisassamut pissanganartumut piareersassavaatit. Sermersuup killinganut apuukkutta, sermiinnarsuarmut qaninissamut piareersassaagut. Sermersuarmut ’ilisimasassarsiulaarnitsinni’ Punkt 660 aallaavigissavarput. Nammattakkeriarluta sermiinnakkut aallassaagut. Sermersuaq nunarsuarmi tikikkuminaannerpaat ilagaat, uagulli ornitassarput maninnerulluni aalaakkaaneruvoq. Kamippassuit aluinut ikkussanik saviminernik quaannaveequteqassaagut, angalaarnermilu ajaappiaasartut atorlugit, nal.ak. marlut missaanni ingerlaassaagut. Ingerlaarnitsinnilu paasilissavarput sooq ilisimasassarsiortut sermersuup ikaarnissaa taamak pilerinartittartigigaat.

Tammaarfimmut apuukkutta nassatagut tupernut inissereerutsigit kaffi tii tungusunngitsumernillu tullinnguutissapput. Sila ajunngeriarpat piumaguttalu tammaarfiup eqqaani angalaarsinnaavugut, sermimiinnerullu tupinnartua misigalugu. Assiliiveqarnissarlu pisariaqarluinnarpoq, seqineq tarrilersoq assilisassaqqissagami.

Unnukkiartornerani nerisassagut piareersassavagut, tassa nerisassat panertuliat mamarluinnartut, kissartumik imiliinnartakkat. Tammaarfiiup igaffiani nereqatigeeriarluta unnussiuaaqatigiisaagut. Ullormullu pisunut naammatseqalluta sinngup puuani sinilluassaqaagut. Apeqqutigerusukkunarakkulu, aap tammaarfimmi immikkut tupeqarpoq perusuersartarfiusumik.

Ullut pingajuat: Sermersuarmiinneq Kangerlussuarmullu uterneq

Ullaakkut iterutta sermersuarmi angalaalaarnissaq tullinnguutissaaq. Ullaakkorsioreerutta sermiinnarsuarmut angalaaqqilaassaagut. Silalu apeqqutaatillugu Russel Gletsjer angussavarput.

Russel Gletsjer qanilligutsigu sermip qulloorneri takussavagut, soorunami tikivinnagit. Taakku qulloornerit sermersuup iigartarneranut pissutaapput. Quaannaveequtit ajaappissallu nassassavagut, isumannaatsumilu angalaassagatta allunaasamik nassassangilagut.
Sila apeqqutaatillugu angalaarnitsinni imaluunniit tammaarfimmi, ullup qeqqasiussaagut. Ullup qeqqata kingorna nassatagut poortoriarlugit Punkt 660-p tungaanut ingerlassaagut. Sermip sinaanut pigutta aallertumut ilaalluta utimut ingerlassaagut. Unnukkut pilersaaruteqanngilagut, sunissallu illit nammineq aalajangissavat.

Unnukkut Polar Lodge-mi nammineq nerisassiorsinnaavutit, hotelip neriniartarfiani cafeteriaaniluunniit nerillutit imaluunniit Roklubbiliaqatigeqqilluta.

Ullut sisamaat: Nuummut timmisartorneq

Ullaap tungaani sakkutooqarfittoqqami pissuttuarsinnaavutit.

Nuummut aallarnissamut nassatanik tunniussineq ualikkut pissaaq.

Akia, inimi marluuttarissami kr. 7.025-miit.

Junimi angalanerit corona peqqutaalluni akikilliliivigineqartarput.
Inimi marluuttarissami inummut ataatsimut: AKIKILLISAAT: 915 kr.
Inimi kisermaattariami inummut ataatsimut: AKIKILLISAAT: 1.415 kr.

Angalaarnissat aaqqissuussagut Kalaallit Nunaanni illoqarfinnit tamanit aaqqissuunneqarsinnaapput. Allallutit sianerlutilluunniit akinik paasiniaagit.

Angalaneq nr. 2021

Juni – september

Ullut sisamat

Ulloq Nuummiit aallarfik

Nammineq (angalaqatigiiunani) angalaneq

 

Paasissutissat naleqquttut

Angalanermi ilaanngillat
Nerinerit qulaani taaneqanngitsut
Angalanerup nalaani sillimmasiissutit

 

Nassatassat nassarneqarsinnaasut
Tunniussassat 20 kg tigummiagassallu 8 kg (tigummiat annerpaaffigisinnaasaa: 55 x 40 x 23 cm).

Angallarluttut kaassuartakkamiittullu
Ajoraluartumik angalaneq angallarluttunut kaassuartakkaniittunullu naleqqutinngilaq. Angalaarnerit Nunatta Angalatitsivianit aaqqissuussat ajornassutsimikkut angalasunut angallarluttuunngitsunut naatsorsuussaapput. Kissaataasoq naapertorlugu angalasup pisariaqartitaa eqqarsaatigalugu, angalanerup piukkunnassusaa pillugu paasissutissiinissatsinnut soorunami piareersimavugut. Maluginiaruk nakorsaanermut tunngasutigut siunnersuinissamut piginnaasaqannginnatta, illit angallarluttutut Nunatta Angalatitsivianik oqaloqateqarneq tunngavigalugu angalanissaq una toqqarukku, nammineq akisussaaffigissavat.

Nunagisaq qimannagu Kalaallit Nunaanni sulinngiffeqarneq - staycation

Angalanerinnanngitsunik aammali toqqissisimanermik tuniniaagaqarpugut. Kalaallit Nunaannik immikkut ilisimasaqarpugut, nunalu avannaaniit kujataanut ilisimalluarlugu. Taamaatumillu sullitagut toqqissisimatilluartuarpagut. Aqqutaa tammaat.

Apeqqutissaqarpit? Angalatitsinermut immikkut ilisimasalittatta ilaannut saaffiginnigit.

Angassaguit uagut aqqutigaluta inniminniigit. Angalanissannik pilersaaruit allaffigisigut, periarfissarsiussavatsigit. Aamma 701107-mut sianernissamut tikilluaqquatsigit.