SULIFFINNUT ATATILLUGU ANGALANERIT ILISIMASAQARLUARFIGAAGUT AQQUTAA TAMAAT TOQQISSISIMATISSAVATSIGIT AIR GREENLANDIP NUNATTALU ILAGAATIGUT

Qasigiannguani qimusserneq – ullut sisamat!

Ulluni sisamani angalaneq ulluni marlunni qimussernertalik illuaqqamilu unnuinertalik

CORONAQARNERANI AKIKILLISAGAQ! Paasissutissat ataani takukkit.

 

Angalanermi uani Qasigianngualiassaatit tassaniinninnilu ulluni marlunni qimussimik angalaarneq Tasiusallu kangerluani inuilaarsuarmi illuaqqami unnuineq misigissavatit. Qaasuitsup avannaani issittumi ukiuunera misiigissavat neriuppugullu aamma inuilaarsuarmi arsarnerit misigissagitit.

Qasigiannguanut, illoqarfimmut kusanarlunilu qangarsuarli tunngavilikkamut, tikikkuit illoqarfimmi paasisassarsiornermik angalaariarlutit ulluni marlunni qimussimik angalaarnissamut piareersassaatit.

Qimussernermilu illoqarfik qimallugu pinngortitami issittumi ulluni arlalinni qimmit qimukkusussusillit siuttoralugit ingerlaarneq misigissavat. Qimmit kusasartorsuit qimmitut inimiuttatut pineqarsinnaanngillat. Amaqqunik siusaasaqarput, qimmilli qimuttut inuit piginnitsitik sungiusimallugit inooqatigaat, Kalaallit Nunaannilu ukiuni 1000-ngajanni qimuttutut atorneqarput. Qimmillu nuannareqalugu atuuffiat tassaavoq qimuttuuneq.

Qimussernermi qaqqatigut, kangerlutsigullu ingerlaariarluta Ilulissat Kangerluata kujataaniittumi Tasiusap kangerluani illuaqqami unnuissaagut. Kalaallit Nunaata pissarititaanik nerissaagut, aammalu piniartutut aalisartutullu inuunermik oqaluttuunneqarluta.

Aqaguani Qasigiannguanut uterluta aallassaagut, hotelimullu kialaartumut tikikkutta, unnukkut nerilluataarumaarlutit.
Aamma qimussimik ilisimasassarsiornermik taasamik angalanissamut neqerooruteqarpugut, tassanilu illuaqqami tupermilu unnuinerit marluk ilaapput.

Angalaneq sivitsorlugu Ilulissanut akunnittoqarsinnaavoq.

Misigisassat pingaarnerit!

  • Ulluni marlunni qimussimik angalaarneq
  • Inuilaarsuarmi illuaqqami unnuineq
  • Qeqertarsuup tunuani illoqarfinnguami inuunermik misigineq
  • Kalaallit Nunaata avannaani eqqissisimaneq misigiuk

Angalanermut ilaapput

  • Nuummiit Aasiannut imal. Ilulissanut timmisartumik siumut utimullu angalaneq
  • Qulimiguulimmik Aasianniit Ilulissaniilluunniit siumut utimullu Qasigianngualiarneq
  • Qasigiannguani angallanneqarneq
  • Hotel Diskobay-mi unnuinerit marluk (nammineq uffarfeqarlunilu perusuersartarfilimmi)
  • Illuaqqami unnuineq ataaseq
  • Ullaakkorsiorneq
  • Qimussimik angalaarnerup ingerlanerani nerisaqarneq (erngup, tiip kaffillu saniatigut nammineq imeruersaatissat ilaanngillat)
  • Hotel Diskobay-imi tikilluaqqusilluni nereqatigiinneq
  • Tikilluaqqusineq qimussernissamullu ilisimatitsineq
  • Qasigiannguani (nal. 2-3-mit iluini) illoqarfimmi angalaarneq katersugaasiviliarnerlu
  • Akileraarutit akitsuutillu tamakkiisut, ulloq manna tikillugu Nunatta Angalatitsivianut paasissutissiissutaareersut
  • Angalasut angalanissamik qulakkeerissutitut anginngaasaateqarfiannut akiliut
  • Akimi ilaapputtaaq nassatat 20 kg aamma 8 kg nammineq tigumiat
Ullormut pisussat
Ulloq siulleq: Timmisartumik – qulimiguulimmillu Nuummiit Qasigianngualiarneq. Inissinneq illoqarfimmilu takornariarneq

Ingerlaannangajak paasissavat Qasigiannguit tassasoq Qeqertarsuup tunuani illoqarfittut angingitsutut takorloortakkannut eqquuttoq. Illoqarfik 1.300 miss. innuttaqartoq nunasiaanerup nalaani pilersitaavoq. Illoqarfik anginnginnami illoqarfeeqqatut misiginarpoq. Illoqarfimmi qimussit takussaapput. Qasigiannguit isumaqarput puisinik qasigissanik najorneqartoq, qanga taamaassimagami. Qasigiannguit eqqaanni suli puiseqarluarpoq aasamilu arfeqarluartarluni.

Illoqarfimmi takornariarluni angalaarneq katersugaasivimmullu soqutiginarluartumut takornariarneq
Qasigiannguit paasisassarsiorfigissallugit nuannersuuvoq, illoqarfiullu katersugaasivia aamma takusassavarput. Katersugaasivik Poul Egedelli nalaanit pisiniarfiusimasumi 1734-meersumiippoq, tassaniippullu aamma Saqqaq kulturip nalaaniit (ukiut 2000-t miss. Kr.sioqq.) qanganisarsiuut assaanerinit nassaat immikkut ittut. Aamma takuneqarsinnaapput ilaatigut piniartuunermit aalisartuunermiillu takussutissiatut saqqummersitat, soorlu raajanik tunisassiorneq 1960-ikkunniilli ukiuni qulikkaani arlalissuarni Qasigiannguanik ingerlalluartitsisimasoq, taamani raajat guldinik aappalaartut qaamasunik taaguuteqarallarmata.
Qanoq qimussertarnermik ilitsersuunneqassaatit, amernillu atisaliat misilissavatit, naammagisannik pissarsissaagut.

Hotel Diskobay-imi tikilluaqqusilluni nereqatigiinneq
Unnukkut isikkivigissumi nereqatigiissaagut. Qilanaalereersinnaavutit. Hotel Diskobay hoteliuvoq angivallaarani persuarsiorpalaanngitsoq. Hoteli immap qulinnguaniippoq Qeqertarsuup tunuata tungaanut isikkivilik, kaperlanngiffiani. Ukiup taamaalinerani ullut sivitsoriartorlualereertarput, isigisarlu kusanassamaaqaaq.

Ullut aappaanni: Tasiusap illuaraata tungaanut nal.ak. sisamat qimusserneq aallartissaaq. Apuuffimmi pisummik angalaarneq

Ullumi qimussernerit aallartissaaq, illoqarfiullu avatinnguani qimmeqarfimmi qimussiussisussat naapissavat, ikioqatigiillusilu qamutit usilersussavasi.

Tasiusallu kangerlualiarluta 35 kilometerit qimusserneq aallartissaaq. Tassanilu unnuiffissatsinnut illuaqqamut nuannersumut tikissaagut. Qaqugu apuunnerput, ullullu takissusaa, apeqqutaatillugit aputisiutilerluta avatangiisimi nuannersumi pisuttuarnissamut periarfissaqassaaq. Tatsimullu sikumik, aatsillugu tiimut kaffimulluunniit imiliassatsinnik, aallissaagut.
Unnukkut nerisassiussaagut, igaassagullu qimussiussisuppit imaluunniit hotelimi sulisut arlaata pisarai. Qulisimanngeriarpallu, qaammaqutit nalinginnaasut qimallugit, arsarnernik isiginnaarsinnaassaatit.

Ullut pingajuanni: Qasigiannguanut uterneq

Neriuppugut illuaqqami nuannersumi sinilluarsimassutit. Qasigiannguanut utissalluta qimussimik allannginnitsinni ullup qeqqata tungaanut pisuttuartoqarsinnaavoq.

Qasigiannguanut uterutta nissut eqaarsaartinnissaat kissalaartumillu uffarnissaq tullinnguutissaaq.

Ingerlaannarlu innarsimanngikkuit unnukkut hotelip neriniartarfiani nerilluataarsinnaavutit.

Ullut sisamaat: Nuummut uterneq imaluunniit Ilulissanut ingerlaqqinneq

Ullut sisamaanni angerlarnissaq pissaaq, Qasigiannguanilu heliportimut biiliunneqassaatit.

Angerlarsimaffiillu taamak ungasitsigilereerakku, qimussimik ilisimasassarsiornerit Ilulissanukarnermik sivitsulaarsinnaavat, tassanilu hotelimi pitsassuarmi Hotel Arcticimi, sisamanik ullorialimmi, najugaqarlutit, Ilulissat Kangerluat misigalugu, UNESCO-llu eqqissisimatitaanut Sermermiunut angalaarlutit. Taamatut iliorusussaguit paasiniaaffigisigut.

Nivé Frankilu

Akia, inimi marluuttarissami kr. 14.895.
Kisimiinniaraani tapiut kr. 800.

Coronaqarnerani akikillisaatit peerneqassapput
Inimi marluuttarissami inummut ataatsimut: AKIKILLISAAT 800 kr.
Inimi kisermaattariami inummut ataatsimut: AKIKILLISAAT 1.300 kr.

Angalaarnissat aaqqissuussagut Kalaallit Nunaanni illoqarfinnit tamanit aaqqissuunneqarsinnaapput. Allallutit sianerlutilluunniit akinik paasiniaagit.

Angalaneq nr. 2001

Januarimiit martsimut

Ullut Sisamat

Nuummiit aallarluni

Nammineq (angalaqatigiiunani) angalaneq

 

Paasissutissat naleqquttut

Angalanermi ilaanngillat
Nerinerit qulaani taaneqanngitsut
Imeruersaatit
Angalaarnerit nammineq toqqakkat
Angalanerup nalaani sillimmasiissutit

Nassatat nassarneqarsinnaasut
Tunniussassat 20 kg tigummiagassallu 8 kg (tigummiat annerpaaffigisinnaasaa: 55 x 40 x 23 cm).

Angallarluttut kaassuartakkamiittullu
Ajoraluartumik angalaneq angallarluttunut kaassuartakkaniittunullu naleqqutinngilaq. Angalaarnerit Nunatta Angalatitsivianit aaqqissuussat ajornassutsimikkut angalasunut angallarluttuunngitsunut naatsorsuussaapput. Kissaataasoq naapertorlugu angalasup pisariaqartitaa eqqarsaatigalugu, angalanerup piukkunnassusaa pillugu paasissutissiinissatsinnut soorunami piareersimavugut. Maluginiaruk nakorsaanermut tunngasutigut siunnersuinissamut piginnaasaqannginnatta, illit angallarluttutut Nunatta Angalatitsivianik oqaloqateqarneq tunngavigalugu angalanissaq una toqqarukku, nammineq akisussaaffigissavat.

Nunagisaq qimannagu Kalaallit Nunaanni sulinngiffeqarneq - staycation

Angalanerinnanngitsunik aammali toqqissisimanermik tuniniaagaqarpugut. Kalaallit Nunaannik immikkut ilisimasaqarpugut, nunalu avannaaniit kujataanut ilisimalluarlugu. Taamaatumillu sullitagut toqqissisimatilluartuarpagut. Aqqutaa tammaat.

Apeqqutissaqarpit? Angalatitsinermut immikkut ilisimasalittatta ilaannut saaffiginnigit.

Angassaguit uagut aqqutigaluta inniminniigit. Angalanissannik pilersaaruit allaffigisigut, periarfissarsiussavatsigit. Aamma 701107-mut sianernissamut tikilluaqquatsigit.