Suliffinnut atatillugu angalanerit ilisimasaqarluarfigaagut
Aqqutaa tamaat toqqissisimatissavatsigit
Air greenlandip nunattalu ilagaatigut
Ilulissat kangerlua Ilimanamilu illuaqqat alianaalluinnartumi inissinneqarsimasut, Nuummiit Qeqertarsuup tunuanut (ulluni pingasuni /unnuani marlunni imal. ulluni sisamani/unnuani pingasuni) angalallutit misigisassarsiorfigikkit.
Ulluni marlunni imminut iluarusutsillutit imaannaanngitsunillu misigisaqarlutit ilorrisimaarnissat pisariaqartippiuk? Taamaassappat eqqortumut pivutit. Maani qasukkarnissamut annertuunillu misigisaqarnissamut periarfissaqarluarpoq.
Angalanermi matumani Ilulissanut timmissutissavatsigit tassanngaanniillu ingerlaannaq angallammik nunaqarfeeqqamut Ilimanamut ingerlatissavatsigit. Ilimanamut aqqutaani Ilulissat kangerluat iluliarsuillu nunarsuarmi ilisimaneqartut sarsutissavagut.
Ilimanaq 50-it missaannik inoqarpoq tikinniariarlunilu eqqissinarnera erniinnaq malugisassaavoq. Qaqqap killingani illuaqqami immamut isikkivilimmiinnermi pinngortitamut qanilluinnarneq misinnarpoq. Nammineq aneerasaartarfinni arlaannik imeruersarlutit, qeqertarsuup tunuanut isikkivissuanit alutorsartinneqarlutit ilorrisimaarit. Iluatitsissaguit nipaanneq arferit anersaarnerannit akornuserneqarsinnaavoq!
Illuaqqamiinnerinnaanngitsoq misigisassaqarputit aammali oqaluttuarisaanermut ilaasuni illutoqqani nerilluarsinnaaneq periarfissaavortaaq. Neriniartarfik Restaurant Egede – 1700-ikkut qiteqqunneranni Paul Egede-ip illorisimasaani alutornaqisumi inissisimavoq.
Ilimanamut angalaneq misigisassaavoq puigugallarunnanngisat, taamaammat ullorsiutinni krydsiliigit angalanissallu uagut aqqutigaluta inniminnerlugu.
Inussiarnersumik maluginiagassat
Angalanissaq taanna marlunnik immikkoortoqarpoq: Ullut pingasut unnuinerillu marluk aappaalu ullut sisamat unnuinerillu pingasut. Tamatuma saniatigut, angalaffissanut timmiffissanullu tunngatillugu, angalaneq sivitsorneqarsinnaanngilaq allatulluunniit allanngortinneqarsinnaanani.
Angalaninni illit kissaatigisat naapertorlugu ullut aaqqissuunnissaannut tamakkiisumik periarfissaqarputit. Ullormmut najoqqutassaq suut sammisinnaanissaannut isumassarsiorfigisinnaavat. Illuaraqarfik Ilimanaq Lodge sammisassanik pissanganartunik arlalinnik- soorlu angallassisoqarluni pisulluni angalaarneq ulluinnarlugulu angalaneq tupinnartoq Glacier Adventure neqeroorutaapputtaaq. Glacier Adventure-imi immakkut angallamik angalaassaatit, nunakkoorummik UTV- mik angalassaatit naggataagullu sermersuarmut qaqillutit.
Misigisassarsiortitsilluta angallassisarnigut nuannerineqarnerpaajupput ullormilu angalanermi najoqqutassamut naleqqusagaallutik. Angalanissannut inniminniininnut atatillugu misigisassarsiorlutit angalanissannut inniminniinissat innersuussutigaarput. Kingusinnerusukkut inniminniiniarninni inisaat tamarmik pisiarineqareersinnaammata.
Ulloq aallarnerlugu siusissukkut Nuummiit Ilulissiarninni aqqutaani tupinnaanartumik isikkiveqassaatit. Ilulissanut tikinninni nunaqarfeerannguamut Ilimanamut angallavissannut ikininni misigisat oqaluttuatut ittut ingerlaannangajak nangissapput. Ilulissat kangerluata paava iluliarujussuarnit immamillu qillalaartumit avatangerneqarsimasoq sarsullugu angalaneq- immaqalu arfermik puisumik naammattoorsivissaq- immikkut misigisassaapput.
Ilimanamut tikikkuit illuaqqamut inigisassannut, nipaatsumi eqqissisimaarfissannut qeqertarsuullu tunuanut isikkivilimmut alutorsarfissannut takkunnerit nalunaarutigissavat. Tassani nal. 10:00- Ilulissaniit angallammut ilaallutit tikikkuit, angallassisoqarluni nunaqarfik angallavigineqarsin-naavoq; inuiaqatigiinnguit oqaluttuarisaanerat, illulioriaaseq ulluinnarnilu inuunerat misigisinnaavatit.
Nunaqarfimmi angallanneqarluni misigisassarsiorneq (immikkut pisiassaq)
Angallassisoqarluni nunaqarfimmi angalaarneq, illuaraqarfimmi Ilimanaq Lodge-imiinnermi pingaaruteqarluinnarpoq. Tassani nunaqarfimmi inuuneq qangaaniillu ileqqut kinguaariinni inuiaqatigiinnik ilusiliisimasut, immikkuullarissumik paasisaqarfigissavatit.
Angalaarnermi, najukkami angallassisartup Ilimanap oqaluttuassartaani kulturiannilu imartuumi angallatissavaatit. Nunatsinni nunaqarfeerannguami 50-iinnarnik inulimmi – septembarimi issilersartumi maajimilu aatsaat upernalersartumi, inuunerup qanoq inneranik qaqutiguinnaq misigineqartartunik paasisaqassaatit.
Taama avinngarusimatigisumi qanoq ilillutik imermik sarfamillu pissarsisarpat? Suminngaanniit nerisassanik pissarsisarpat? Suliffimmi sunngiffimmilu sulerisarpat? Angallassisuppit nammineq misigisaminik avitseqatigissavaatit, nunatsinnilu nunaqarfiit avinngarusimanerpaat ilaanni pissutsinik piviusunik paasinnilersillutit.
Ualikkut Ilimanami pinngortitap alianaatsup nammineq misiginissaanut periarfissaqarpoq. Sineriak sinerlugu pisuttuarsinnaavutit, illut qalipaatigissaartut alutorsaatigaligit, nipaassuserlu taamaallaat anorimit mallillu sallaatsumik qaartarnerannit akunneqartoq, misigalugu. Nunaqarfik nipaalluinnartuuvoq massakkorpiaq pisumut eqqarsaatersorsinnaavutit pinngortitamiillu tiguartillutit. Tamatumunnga taarsiullugu angallassisoqarluni qeriuaannartup narsarsuani pisunneq (tundrahike) toqqarneqarsinnaavoq. Aqaguani glacier adventure-imut (sermimut iigartartumut angalanermut) peqataarusunngikkuit, kingusinnerusukkut taamaaliorsinnaassaatit.
Tundrahike (immikkut pisiassaq)
Avannamut Ilulissat kangerluanut angalaarnermi alianaatsumi tamatumani, pingortitaq alianaalluinnartoq misigiuk. Aqqutaani Qeqertarsuup tunuanut iluliarsuarnullu ataqqinarpasissunut ingerlaartunut isikkivik tiguartinnartoq misigissavat. Pinngortitami angalaarnitsinni, iluatsitsissagutta immaqa aamma teriannissanik, ukallinik allaallu immaqa umimmannik naammattoorsisinnaassaagut.
Aputeqannginnerani maaniikkuit qeriuaannartup narsarsuata naasui assigiinngitsorpassuit, naasut akutissat tipigissut naasullu qalipaatigissut avatangiisini kusanaqisut takussavatit. Nuna tamanna oqaluttuarisaanermi piffissani arlalinni najugarineqarsimavoq, qanga inooriaasaasimasoq– minnerunngitsumik inuit ilivitoqaanni kulturikkut kingornussanik annertuunik takussutissartalimmi- ersarisumik malugisinnaassavat.
Angallassisuppit misilittagartuup angalaneq tamakkerlugu toqqissisimanissat qulakkiissavaa, nunamilu tassani pinngortitaq oqaluttuarisaanerlu pillugit oqaluttuanik – tamarmik inuttut namminermiit najukkamiillu isigalugit alutornartunik- avitseqatigalutit. Misigisassarsiorluni angalaarnermi tamatumani meeqqat aqqaneq marlunnik ukioqalereersimasut kisimik peqataasinnaapput.
Unnukkiartulerpat neriniartarfimmi Egede-mi nerisassat pitsaasut, najukkami nerisassiassat- soorlu aalisakkat nutaat, tuttup umimmaallu neqaat, nerisassioriaaseq nutaaq atorlugu nerisassiarineqartut, piareersimassapput. Neriniartarfimmi alianaatsumi kangerlummut isikkivilimmi, avatangiisini eqqissinartuni, ullormut misigisimasat eqqarsaatigalugit nerisat ilorrisimaarutaasinnaapput.
Ulloq misigisanik ulikkaartoq qaangiuppat illuaqqanni qasuersaarsinnaavutit. Immaqa aneerasaartarfimmi silaannarissarsinnaavutit imal. Qeqertarsuup tunuata alianaannersuanik avatangiiseqarlutit- sinilertinnak pinngortitami nipinik naalaarlutit.
Illuaqqanni sinilluareeruit, issittumi silaannarissumi Ilimanamilu eqqissinartumi itissaatit. Ullumi ulloq illit namminersorfigissavat, neriniartarfimmilu ilorrisimaarlutit ullaakkorsiutitoreeruit nammineq misigisassarsiornissannut periarfissaqarpassuaqarputit.
Ilimanap immikkuullarissumik inissisimaffeqarnera, nunakkut soqaranilu allanngortinneqan-ngitsukkut pisuttuarnissamut nalissaqanngitsumik periarfissiivoq. Sineriak atuarlugu isoratunngitsumut imal. qeriuartup narsarsuanut isorartunerusumut pisunnissaq toqqarukku, Qeqertarsuup tunuanut isikkiviit, iluliarsuit, pinngortitarlu alutornartut takussavatit. Aqqutaani iluatitsillutit uumasunik – soorlu teriannissanik, nattoralinnik immaqalu allaat umimmannik takusaqarsinnaassaatit.
Annertunerusunik misigisaqarusukkuit misigisassamut oqaluttuatut ittumut Glacier Adventure-imut misigisassarsiorlutit, tamaani serminut iigartartunut alutornaqisunut angalanermut peqataallutit, puigugassaanngitsumik misigisaqassaatit.
Ilimanaq Glacier Adventure (immikkut pisiassaq)
Ilimanaq Glacier Adventure-ip, nunami tamaani pinngortitami asimiittumi kangerlunni qinngortuuni sermit iigartartut sermersuarlu qanillivillugit angallatissavaatit.
Misigisassarsiorneq, kujammut Ilimanamiit Itilliup Iluanut angalanermik alinaatsumik aallartissaaq. Tassani sissamut pavungangaatsiaq sioralimmut niugutta nunakkoorutit UTV-it narsaannarsuakkut kangerlummut Tasiusamut – ukiuni tuusintilikkaani piniariartarfiusimasumut angallanniarluta piareersimassapput.
Tasiusamiit iluliarsuit ilulissallu minnerusut imaannaanngitsut akornisiorlugit ingerlaqqissaagut. Kangerluup qinngorpiaa pallikkiartulerutsigu, sermit iigartartut alutornaqisut marluk ersissapput, tunuannilu sermersuaq saqqummerluni. Tassunga pissaagut sermersuarmullu isikkiveqarluta taqussagut ilorrisimaarutigalugit nerissavagut, tamatumalu kingorna pinngortitami immikkuullarilluinnartoq taanna misiginiarlugu, sermersuarmut ingerlassaagut. Tamatuma kingorna aqqutaa atuarlugu Ilimanamut utissaagut. Misigisassarsiorluni angalaarnermi tamatumani meeqqat aqqaneq aappeereersut kisimik peqataasinnaapput, angalaarneq taanna qitiluttunut innersuussutiginngilarput.
Neriniartarfimmi Egede-mi iluarusutsinneqarlutit, unnukkut najukkami nerisassiassanit nutaanit mamasaarluakkanit ilorrisimaaruteqarit. Alianaatsunik avatangiiseqarlutit ullukkut misigisatit qamunga ilunnut toqqortersinnaavatit.
Soorunalumi neriniartarfimmi Egede-mi ullup qeqqasiutissat ilorrisimaarutigisinnaavatsittaaq.
Ilimanamiinnerit naggaserlugu ulloq eqqissinartumik ilorrisimaarsinnaanermik aallartissaaq. Eqqissillutit ullaakkorsiorit, silaanariup Qeqertarsuullu tunuanut iikkiviup alianaatsup ilorrisimaarutiginissaanut imminut piffissalerit. Ullaap tungaa nal. qulit nallertinnagu illuaqqamiit anereersimassaatit aallarnissannullu piareerlutit.
Tamatuma kingorna Ilulissanut utissaatit, tassanilu Ilulissat kangerluat naggataamik angallavigisinnaassavat, iluliarsuillu alutornaqisut naggataamik assilillugit. Ilulissanut uteruit Nuummut uterlutit angalanissat sioqqullugu immaqa pisulaarnissamut piffissaqalaarsinnaassaatit.
Eqqaamasanik ulikkaarlutit pinngortitarsuaq alutornartoq, misigisat nalissaqanngitsut nunatsinnillu piviusumik takunnissimallutit, illoqarfiit annersaannut utissaatit – misigisatigut pisuunnguallassimallutit inuunerpillu sinnerani oqaluttuassaqalerlutit.
MALUGINIAQQUSAQ: Ullut sisamat/ unnuinerillu pingasut illuaraqarfimmi Ilimanaq Lodge-imiinnissaq toqqarsimagukku, - ass. angallassisoqarluni nunaqarfimmi angalaarneq tundrahike-ilu ullormi ataatsimi ataatsikkoortussaajunnaarlugit, misigisassarsiornissamut najoqqutassaq allanngortinneqarsinnaavoq. Ullormik ataatsimik saniatigut piffissaqaraanni aamma allanik nammineq angallavissaqarpoq.
Illuaraqarfimmi Ilimanaq Lodge-imi illuaqqat 15-it quleriinngorlugu ilusiligaapput nunamullu avatangiisaasumut pissusissamissut inissitatut ilusiligaallutik.
Illuaqqat tamarmik immikkut kusarnartunik ilorrisimaarnartunillu pequsersorlugit aaqqissugaapput immikkullu uffarfeqarlutillu perusuersarfeqarlutik. Atortorissaarutinut ilaapput imeq kuuiinnartoq, kissartumik qorlortitsivik qaammaqqutit kiassaatillu innaallagisamoortut.
Illuaqqat immikkut tamarmik seqernup kissaanit nukiliuutiminnit kiassarnermut qaammaqqutinullu sarfalersuuteqarput. Sarfaq sinneruttoq nunaqarfimmut akikitsumik tunineqartarmat, nukissanik sipaarnerpit annertusiartornera ilutigalugu, najukkami inuiaqatigiinnut pitsaasumik sunniuteqarnerit annertusiartussaaq. Nunatsinni aasaanerani qaamanertusineq seqernup nukinganik annertunerpaamik pissarsinissamik qulakkeerisarpoq.
Siniffiit marluk- marluutassatut imal. immikkoortillugit atorneqarsinnaasut- qullermiipput. Ataani siniffinngortartumik inunnut allanut marlunnut inissalimmik nalaasaarfeqarpoq. Iigaq qulaaniit ataanut igalaaginnaq, tiguartinnartumik imaanut samungarsuaq avungarsuarlu isikkiveqarpoq. Tassani iluliarsuit Ilulissat kangerluaniit aniasut sarsuasut qipoqqaallu silatinnguani puillattaartut takuneqarsinnagajupput.
Angalaneq nr. 6011: Ullut pingasut /unnuillu marluk.
Angalaneq nr. 6012: ullut sisamat/unnuit pingasut.
Angalanermi matumani illuaqqami nalinginnaasumiinneq neqeroorutigaarput. Pitsaassutsimut qaffasinnerusumut allanngortitsinissaq kissaatigigukku, takkullutit nalunaarninni (immikkut akiliillutit) taamaaliorsinnaanissat paasiniarsinnaavat.
Angalatitsinigut nunatsinni illoqarfinnit tamanit ingerlanneqarsinnaapput. Allaffigaluta sianerlutilluunniit akinik apeqqutilliigit.
Una angalaneruvoq immikkut aaqqissuussaq.
Timmisartorfissat
Angalaffissanut piffissat allanngorarsinnaapput ulloq angalaffissaq apeqqutaalluni.
Aallarfissat timmisartortitseqatigiinnit allanngortinneqarsinnaanerat inussiarnersumik maluginiaqquneqarpoq.
Angalaneq una allanngortinneqarsinnaananilu sivitsorneqarsinnaanngilaq.
Ilaanngitsut
Ilimanami neriniartarfik ataasiinnaavoq pisiniarfeeqqamilu Pilersuisup ingerlataani pisiassat killeqarlutik. Taamaammat neriniartarfimmi Egede-mi nerisarnissaq innersuussutigaarput.
Misigisassarsiorluni angalaarnerit, ullup qeqqani unnukkullu nerinerit, aallartinnani imal. Ilimanamut tikereernermi inniminnerneqarsinnaapput.
Angalatitsinermut immikkut ilisimasalittatta ilaannut saaffiginnigit.
Angassaguit uagut aqqutigaluta inniminniigit. Angalanissannik pilersaaruit allaffigisigut, periarfissarsiussavatsigit. Aamma 701107-mut sianernissamut tikilluaqquatsigit.
Kalaallit Nunaat:
+299 70 11 07
booking@greenland-travel.gl
København:
+45 3313 10 11
erhvervcph@greenland-travel.dk
Nunatta Angalatitsivia
Aqqusinersuaq 3A
3900 Nuuk
Grønlands Rejsebureau
Wilders Plads 13A, 1.
DK – 1403 København K
Ataasinngornermiik
tallimanngornermut:
Oqarasuaat:
9:00-16:00
Iserluni saaffiginnittarfik:
Kalaallit Nunaat: 10.00-15.00
København: 9.00 – 15.30
