Ulluni sisamani Tasiilami alianaalluinnartumiinneq

Tasiilap kusanassusaa qaqqat inngigissut akornanni – timmisartoq unnuinissarlu ilanngullugu kr. 6.145-miit

Nunatsinni illoqarfiit amerlasuut pinngortitami alianaatsumik inissisimaffeqarput, ikeqaalli Tasiilap inissisimaffianut pinngortitamut kusanaqisumut nallersuunneqarsinnaasut. Avatangiisit qaqqanit portusuunit qutaarlunnit ungaluneqarsimasut tikinnissaat Tasiilap kajungernaqutigaa.

Tasiilaq eqqaalu, Ilulissanuttaaq takornarianit takorusunneqartartunik immikkooruteqarpoq, tassalu iluliarsuarnik, serminik iigartartunik, qimminik qimuttunik, ulluinnarni inuunermik, sanalukkanik pitsaassutsimikkut nunarsuarmi pitsaanerpaanut ilaasunik peqarneq, tikinneqarsinnaasunillu arlalinnik nunaqarfeqarneq. Tasiilaq puigunaatsorsiassannik immakkut nunakkullu angalaarnernik neqerooruteqarpoq.

Tunu Kitaaniit kingusinnerusukkut pinngornikkuummat qaqqat inngillit takussaanerupput. Tasiilami pinngortitaq takuminarnerpaajuvoq, piterarlu kinguneqarsinnaasartoq kisiat pinnagu, inuunerup ingerlaneranut tunngaviliisuulluni. Tamanna ass. illoqarfiup sikorsuarnit orninneqarsinnaasannginnera pissutaalluni, taamaallaat qaammatit marluk pingasullu akornanni umiarsuaqartarneranik kinguneqarportaaq. Qujanartumilli Air Greenland ukioq kaajallaallugu Kulusummut Tasiilamullu angalasarpoq.

Angalanissamut najoqqutassaq

Angalanermi matumani Tunumi illoqarfimmut assissaqanngivissumik tikeraarnissamut toqqammavissinneqassaatit. Tasiilami misigisassarsiorlutit immakkut, nunakkut silaannakkullu angalanissanut alutornarluinnartunut periarfissaqarputit. Hotel Angmagssalik allallu misigisassarsiorluni upernaakkut ukiakkullu angalanissanik alianaaqisunik neqerooruteqarput. Ataani ilaat oqaatigissavagut, allarpassuarnilli aamma periarfissaqarpoq.

Misigisassat pingaarnerit!

Alutornarnerpaat

Qaqqarsuit Tasiilap avatangiisai
Sermillip Kangerluani iluliarsuit
Qimmit qimuttut miaggoorneri qilunnerilu
Sumiorpaluut immikkuullarissoq
Qummukajaaqaqimmat niutit nukkassassavatit!

Akimut ilaapput

Air Greenland-ip timmisartuanut suluusalimmut ilaalluni Nuummiit Kulusummut uterlugulu angalaneq
Air Greenland-ip qulimiguulianut ilaalluni Kulusummiit Tasiilamut uterlugulu angalaneq
Tasiilami angallanneqarneq
Hotel Angmagssalimmi immikkut uffarfeqarlunilu perusuersarfilimmi pingasoriarluni unnuineq
Ullaakkorsiorneq
Nassatat 20 kiilut timmisartumilu tigumiarlugit nassatarisinnaasat 8 kiilut
Ulloq manna tikillugu akitsuutitut Nunatsinni Angalatitsivimmut nalunaarutigisat

Ullormut pisussat

Ulloq siulleq: Nuummiit Tasiilamut angalaneq illoqarfimmilu angalaarneq

Nuummiit Kulusummut, Tasiilamit ungasigani qeqertami anginngitsumiittumut timmisartumik angalassaatit. Kulusummut apuunninniit qulimiguulimmut ilaallutit nuna pinnerluinnartoq qulaallugu Tasiilamukarninni nuannersut oqaluttuatut ittut aallartissapput.

Tasiilamut apuulluareerlutit akunnittarfimmi sulisumit Hotel Angmagssalimmut ingerlassisussamit tikilluaqquneqassaatit. Inissereeruit illoqarfimmi angalaarnissaq, akunnittarfimmi inniminnerneqarsinnaasoq, isumaliutigisinnaavat.

Tasiilap illoqarfiani angalaarneq
Tasiilap illoqarfiani pisulluni angalaarneq nal. ak. marluk pingasullu akornanni sivisussuseqarpoq, aqqutaanilu katersugaasivik, oqaluffik umiarsualivillu takuniassavatit, angallassisullu Tunumi inuuneq pissanganartoq oqaluttuarissavaa. Kitaanit Tunup immikkoorutigaa, Gustav Holmip ukiut 130-iinnaat matuma siorna umiamik ilisimasassarsiorneragut, Europamiunit aatsaat tikinneqarsimaneq.

Ullut aappaanni pingajuannilu: Tasiilami ullut nammineq atorsinnaasat

Eqqissillutit nipaannera ilorrisimaarutigiuk. Tassani – qimmit qimuttut miaggoornerannit, kitaata kujataamiuinut pissanganartumik ilalaarlugu, anersaartornerit tusaasinnaassavat. Tasiilami misigisassarpassuaqarpoq, angalanermilu matumani misigissassarsiornissamut qasuersaarnissamullu piffissaqarluarpoq. Pinngortitaq pisulluni qanittumut ungasinnerusumullu angalaarnissamut qaaqqusivoq, sivisuumillu unillatsiartarnissat ilimanarpoq, isikkivimmi alutornarluinnarpoq. Aaku misigisassarsiorluni angalanissanut siunnersuutit sisamat:

Iluliarsuit akornanni angallammik angalaarneq
Angallammik sikorsuarnut 10 meterit pallillugit issussusilinnut, avannaaniit saatsersunut, Qalasersuup Avannarliup eqqaani immami pilersitanut angalaneq alutornartoq. Sikorsuit ilulissallu misigissavatit ulluinnarnilu sikup- pingaartumik upernaakkut aasallu aallartisimalernerani- aqutsisuusinnaasarnera malugissallugu. Sermilimmi ilulissat, kangerlummi serminit iigartartunit angisuunit arlalinneersuupput. Assiliivippit mobilivilluunniit immernissaa isumagiuk!

Naasuliartarfimmut pisunneq
Qanittumut iliveqarfik sanioqqullugu Naasuliartarfimmut kuummullu qorlortumut aamma pisuttuarsinnaavutit. Issittumi aasaq sivikippoq ulapaarfiullunilu, naasullu qaammatialunnguani naasarput, sikkertarput nutaanillu kingunissanittarlutik. Taamaakkaluaq qaqqani naasut takoranneqaat. Angalaarneq nal. ak. marlunnik sivisussuseqarpoq, aqqutaanilu kaffimik tiimilluunniit nassatassinnik najoqqaassaasi. Angalanerit tamaat angallassisoqassaatit.

Nal. ak. sisamat tallimallu akornanni nasiffimmut pisunneq
Taanna tassaavoq Tasiilami asimi pisulluni angalaarneq. Nunatsinni pinngortitaq kusanaqalunilu peqqarniissinnaavoq, angalaarninnilu matumani qaqqat qaqisarlugit, tatsit kuuillu sinertarlugit pinngortitaq qanittutut misigissavat. Qaqqanut qutaarlunnut inngilinnut kangerlunnullu sikulinnut isikkiveqarpoq. Angallassisup, peqataasut tamakkerlutik malinnaasinnaanngorlugit, qanoq sukkatiginissaq aalajangissavaa, aqqutaanilu nassatassinnik kaffimik tiimillu najoqqaassaasi, taquasilu ilorrisimaarlusi nerisinnaassallugit.

Qulimiguulimmut ilaalluni sermimut iigartartumut Mittivakkat-mut angalaneq
Qulimiguulimmik Ammassallip qeqertaa qulaallugu qaqqarsuit, sermit iigartartut kangerluillu qinngortuut isikkiviliullugit angalaneq alutornaqisoq. Sermimi iigartartumi Mittivakkat-mi ilisimatusartut misissuiffigisannaavannut, ukiullu tamaasa takuniarneqartuartumut 1000 meterisut qatsissusilimmut missaagut. Taanna Sermillip Kangerluanut sikorasaaqisumut alutornaqisumik isikkiveqarpoq.

Attavimmi uani misigisassarsiorluni angalaarnerit annertunerusunik paasisassarsiorfigisinnaavatit:
Arctic Excursions

Ullut sisamassaat: Nuummut uterneq

Ullumikkut Tasiilaq inuulluaqqussavat qulimiguulimmullu ilaallutit Kulusummi mittarfimmut ingerlassallutit, tamatumalu kingorna Dash 8-mik Nuummut ingerlassaatit. Piffissaqqassappat, immaqa Kulusuup nunaqarfittaanut, mittarfimmiit nal. ak. affaata ataatsillu akornanni pisulluni tikinneqarsinnaasumut, ingerlasinnaassaatit.

Hotel Angmagssalik

Nunatsinni isikkiviit Hotel Ammassalimmiit isikkivittut takorannertigisut ikittuinnaapput. Akunnittarfimmut aqqutaata qummukajaajungaatsiarnera nassuerutigerusupparput, tamannali imminut akilersinnaalluarpoq (akunnittarfiup busseeraanut ilaallutit aamma tappavunnarsinnaavutit).

Akunnittarfik immikkoortunik assigiinngitsunik 40-inik initaqarpoq, tassani (akiliilluni atorneqarsinnaasumik) wifi -eqarpoq pitsaasumillu neriniartarfeqarluni.

Akunnittarfiup isersimaartarfia nutartigaq alutornarluni qangamut eqqaanarpoq, koorbunillu filmiliami ilaasutut misigisinnaassaatit. Isersimaartarfiit alianaatsut inillu kusanartut eqqaassanngikkaanni, akunnittarfik isikkivissua alutornarluinnartumik aneerasaartarfaqeqarpoq. Tasiilaq kangerliumanermi alianaatsumi qaqqarsuarnit inngilinnit ungaluneqarsimasumi inissisimavoq. Isikkiviinnaaluunniit periarfissagissaarneruvoq akunnittarfimmilu iluarusunnissat suliniutigineqarluni.

Hotel Angmagssalik tassatuaavoq nunatsinni akunnittarfiit namminersortumik pigineqartumik takornariartitsilluni angallassinernut atugassiamik qulimiguulimmik pigisaqartoq.

Paasissutissat nalinginnaasut

Angalaneq nr. 6030

Inip marluuttarissap inummut ataatsimut akia: 6.395 koruuniniit

Inip inummut ataatsimut naatsorsuussap akia: 7.775 koruuniniit

Nassatanik tunniussinermi inissaq (immikkut akiliuteqarluni) pitsaanermut allanngortinneqarsinnaanersoq paasiniarsinnaavat.

Ullut sisamat/unnuat pingasut
Nuummiit aallarneq
Ataasiakkaanut angalaneq

Timmiffissat
Nuummiit aallarfissaq: Nal. 09.00
Nuummut tikiffissaq: Nal. 13.25

Timmisartortitseqatigiit aallarfissanik allannguisinnaanerat inussiarnersumik maluginiaqquneqarpoq.
Angalaneq allanngortinneqarsinnaananilu sivitsorneqarsinnaanngilaq.
Angalanissat inniminneruk! Massakkorpiaq nunatsinni nittartakkatsinni angalanissanik toqqaannartumik inniminniisinnaannginnatta, Danmarkimi nittartakkatsinnut ingerlateqqinneqassaatit. Una tooruk!

Paasissutissat nalinginnaasut

Ilaanngitsut

Neriffissat qulaani taaneqqanngitsut

Imeruersaatit

Immaqa immikkut misigisassarsiorluni angalaarnissat

Angalanermi sillimasiissutit

Nassatat nammineq tigumiagassat

Nassatap nammineq tigumiagassap angissusisaanut killiliussaq: 55 x 40 x 23 cm

Nassatat nassarneqarsinnaasut
Tunniussassat 20 kg tigummiagassallu 8 kg (tigummiat annerpaaffigisinnaasaa: 55 x 40 x 23 cm).

Angallarluttut kaassuartakkamiittullu
Ajoraluartumik angalaneq angallarluttunut kaassuartakkaniittunullu naleqqutinngilaq. Angalaarnerit Nunatta Angalatitsivianit aaqqissuussat ajornassutsimikkut angalasunut angallarluttuunngitsunut naatsorsuussaapput. Kissaataasoq naapertorlugu angalasup pisariaqartitaa eqqarsaatigalugu, angalanerup piukkunnassusaa pillugu paasissutissiinissatsinnut soorunami piareersimavugut. Maluginiaruk nakorsaanermut tunngasutigut siunnersuinissamut piginnaasaqannginnatta, illit angallarluttutut Nunatta Angalatitsivianik oqaloqateqarneq tunngavigalugu angalanissaq una toqqarukku, nammineq akisussaaffigissavat.

Apeqqutissaqarpit?

Angalatitsinermut immikkut ilisimasalittatta ilaannut saaffiginnigit.

Angassaguit uagut aqqutigaluta inniminniigit. Angalanissannik pilersaaruit allaffigisigut, periarfissarsiussavatsigit. Aamma 701107-mut sianernissamut tikilluaqquatsigit.

Inuussutissarsiummut atatillugu angalanerit - attavigiuk