Nuummi unnuisarfiit

Hotel Hans Egede

Imminut ilorrisimaartinniaruit, illoqarfiup qeqqani akunnittarfimmi pitsaassutsimigut sisamanik ullorialikkami Hotel Hans Egede-mi, init quleriit tallimaanni isikkivigilluinnartumi illoqarfimmi pitsaanerpaamik neriniartafittalimmi Sarfalimmi, inississaatit. Tassanngaanniit Illoqarfiup Nuup qeqqa tamaat qaqqat eqqaaniittut Nuullu ikera takusinnaassavatit. 

Hotel Hans Egede nunatsinni akunnittarfiit annerpaat ilagaat nunarsuarlu tamakkerlugu inuit niuernermik ingerlatsinermut atatillugu angalallutik nunannaariarlutilluunniit nunatsinnut tikerartuarput. Akunnittarfik marlunnik neriniartarfeqarpoq, kaffisorniartarfeqarluni ataatsimeersuartunullu immikkoortortaqarluni.  

Inissanit pitsaassutsit tallimaasunit akikinnerneq, nalinginnaq, pitsaanerpaap tullia pitsaanerpaarlu arlaat nammineq toqqarsinnaavat. Init tamarmik ullaakkorsiornertaqarput, akeqanngitsunik kanaalilinnik TV-kkut isiginnaaruteqarlutik radiolioqarlutillu, internetsimut attaveqarlutik iluaqqinnaanillu siniffeqarlutik (Jensen Senge), soorunalumi pitsaassutsitut toqqakkap qaffakkiartornera ilutigalugu periarfissat annertusiartussapput. Akunnittarfik marlunnik pingasunilluunniit initalinnik 15-inik eqqamini inissiaateqarportaaq. 

Hotel Hans Egede Express

Hotel Hans Egede Express (HHEE) tassaavoq akunnittarfik akikitsoq pitsaassutsimigut marlunnik ullorialigaq Nuummi illoqarfiup qeqqani inissisimasoq. HHEE Hotel Hans Egede-mit pigineqartoq atorsinnaassuseq ilusilersuinerlu qitiutinneqarlutik aaqqissugaavoq inillu tamarmik TV-kkut isiginnaaruteqarput akeqanngitsumillu internetsimut attaveqarlutik. 

Akunnittarfik 108-inik, sisamanik tassalu Express, Family, Pluss aamma Sea immikkoortitikkanik initaqarpoq. Akunnittarfik ullaakkorsiortarfeqarpoq, illoqarfiullu qeqqani neriniartarfippassualimmi inissisimammat, ullup qeqqasiorfissaq unnukkulluunniit neriartorfissaq ungasingaarani. 

Hotel Søma Nuuk

Nuummi Hotel Søma pitsaassutsimigut pingasunik ullorialigaq 43-inik sisamanut immikkoortitikkanik – pitsaanerpaanik, nalinginnaasunit pitsaanerusunik, nalinginnaasunik akikitsunillu initaqarpoq. Taakku saniatigut ininik tallimanik ullaakkorsiutitalimmik unnuiffissaqarmat (Bed & Breakfast) Sømmandshjemmi tamanut neqeroorutissaqarpoq.  

Init amerlasuut ataasiuttakkamik marluuttakkamillu siniffeqarput. Pitsaanerpaat angisuujupput qaamasut TV-ikkut isiginnaarutillit, internetsimut attavillit, oqarasuaatillit, uffarfillit perusuersarfillillu. Nalinginnarnit pitsaanerit aqqaneq marluk angisuujupputtaaq qaamasut siulianisut atortorissaarutillit. Nalinginnaasut nutaaliaapput paarilluagaallutik TV-ikkut isiginnaarutillit, internetsimut attavillit, uffarfillit, perusuersarfillit nutaanillu pisatsersukkat. Ilaqqutatit ilagigukkit inissiamik arfinilinnut inissalimmik akunnittarfeqarportaaq. 

Sømandshjemmip kaffisorniartarfia ineqartunut ullormullu neriartortartorpassuarnut kaffisoriartortartorpassuarnullu isersimaartarfittut atuuppoq. Akunnittarfimmi tamarmi- unnuisuuguit imal. sivikitsumik oqaluussiartoruit internetsimut attavik akeqanngilaq. Nuummi Sømandshjemmi pitsaasunik 50-it pallillugit inissalimmik ataatsimiittarfeqarportaaq, tamatumalu saniatigut piujuaannartitsinissamik toqqammaveqarnissamik eqquutitsinissaq Sømandshjemmimit pingaartinneqaqaaq.  

Inuk Hostel

Inuk Hostel alinaaqisoq, immap killingani Sermitsiamut isikkivilimmi inissisimavoq. Inuk Hostelip qiterisaani ippoq Café Inuk, kaffisorniartarfilik, ataatsimiittarfilik Kalaallillu nerisassaataannik soorlu tuttup savallu neqaannik aalisakkanillu nerisassianik neriniartarfilik. Aasakkut sissaliarsinnaavutit qangalu kalaallit periaasaat naapertorlugu aalisagartorlutit. Inuk Hostel illoqarfiup qeqqaniinngilaq minutsilli 20-iinnaat pisulluni illoqarfiup qeqqa tikinneqassaaq, isikkivillumi taamaaliorusunnarpoq! 

Kaffisorniartarfiup/neriniartarfiup eqqaaniipput illuaqqat sisamat nunatsinni 1930-ikkunni illuliaasarsimasut assilillugit sananeqarsimanermikkut immikkoorluinnaq misinnartut. Illuaqqat tamarmik TV-kkut isiginnaarutilinnik isersimaartarfeqarput. Illuaqqat pingasut sisamanik initaqarput ataaserlu marlunnik initaqarluni, tamarmillu tupinnaannartumik isikkiveqarput akeqanngitsumillu internetsimut attaveqarlutik.  

Hotel Nordbo

Vandsøvejimi Hotel Nordbo 23-inik nutaalianik alianaatsunillu akunniffissanik inissiaqarpoq. Illoqarfiup qiterpiaaniinnginnamik eqqissisimanarput taamaakkaluaq minutsit quliinnaat pisulluni illoqarfiup qeqqa neriniartarfippassualik pisinarfippassualillu tikinneqassaaq. 

Hotel Nordbo sanaartukkani ataatsimoortuni Nuup illoqarfiata qeqqanut isikkivilimmi inissisimavoq inissiallu nutarterlaajullutik nutaanik igalaaqarput, nutaanik pisatsersugaallutik immikkullu uffarfeqarlutillu perusuersarfeqarput atortorissaartumillu igaffeqarlutik. 

Inissiat ilaat amerlasuut immikkut sinittarfeqarput ilaallu ineqarlutillu igaffeqarput nerisarfilimmik. Angerlarsimaffippalaartitsinissaq pingaartinneqarmat sivisujaamik najugaqarnianut toqqagassaqqissuuvoq. tamannarpiarlu pissutigalugu Nordbo errorsisarfeqarportaaq. 

Inissiat tallimanut immikkoortitigaapput:  Inissiat Studio-it, inissiat marlunnik initallit marlunnut, pingasunut tallimanullu naatsorsuussat, superior aappaa affaa angissusilimmik siniffillit, atortorissaartunik igaffeerallit issiaarffissallillu.  

Hotel Aurora

Hotel Aurora Nuummi akunnittarfiit nutaanersaraat. Taanna akunnittarfiuvoq immikkut ittoq, illoqarfiup immikkoortuani suliffeqarfiusimasumi inissisimasoq, minutsilli qulit 15-illu akornanni pisulluni illoqarfiup qeqqa tikittariaalluni. Taamaalilluni akunnittarfippassuarnut Europami illoqarfissuit immikkoortuini qangarnisaanerusuni sanaartukkanut eqqaanarpoq. 

Hotel Aurora 19-inik marluuttarissanik initaqarpoq, aqqaneq marlunnik ilorrisimaarnartunik ilaqutariinnut inissaqarluni ataatsimillu ataasiuttakkamik ineqarluni. Inissat tamarmik uffarfeqarlutillu perusuersarfeqarput, nerisarfimmi isersimaartarfimmilu angisuumi akeqanngitsumik ullaakkorsiortoqarsinnaavoq. Ullup qeqqasiutinik unnukkullu nerisassanik annikitsunik pisisoqarsinnaavortaaq.  

Hotel Aurora Nuummi unnuisarfinnik inissianillu akunnittarfinnik arlalinnik ingerlataqarpoq.