NAIA – Laila Jakobsen

NAIA tassaavoq Nunatta Angalatitsiviata suliffeqarfinnut nittartagatigut angalanissanik inniminniisarfiat, tassa imaalluni ilissi suliffeqarfittut angalanissasi ajornanngitsumik nammineq inniminnersinnaallugit. Aasianniittumi GUX-imeersoq Laila Jakobsen inniminniisarfik pillugu apersulaarsimavarput.

2018-mi Namminersorlutik Oqartussat pisortaneersut angalasarnissaannut suliarinnittussarsiornerminni Nunatta Angalatitsivia isumaqatigiissutinut arlalinnut qinigaasimavoq, 2019-mili januarip aallaqqaataaniit immikkoortortaqarfiit arlallit NAIA atulernissaannut sungiusartussaasimallutik. Ilarisimavaat Laila Jacobsen Aasianni GUX-mi allaffimmiutut atorfilik, sulisut atuartullu angalanissaannut inniminniisarnissanik akisussaaffeqartoq. Laila ukiorparujunni angallannermut tunngasunik misilittagaqarpoq, aammattaaq Arctic Umiaq Line-mi Aasianni allaffeqarallarmata suliffeqarsimalluni, taamaammat nunatsinni angallanneq nalunngisaqarluarfigivaa.

“Ajornanngissimavoq NAIA atulernissaa ilikkapallannarlunilu” Laila oqarpoq. “NAIA atoraanni inissat ingerlaannaq inniminnerneqartarput, sullissisuniillu angalanissamut pilersaarummik utaqqeqqaartariaqarnani. Nammineernermi akitsuutit aamma akikinnerusarput.”

Aasianni GUX-imi angallannermut inniminnertagaannut katillugit 84 %-ii NAIA-kut inniminnertarpaat, taamaammat Laila apersornissaa nalaatsornerisimanngilaq. NAIA-lerisutta oktoberimi Laila pulaarpaa, kissaatigaarpullu ukiup ingerlanerani NAIA-mik atuisut amerlasuut pulaartarsinnaallutigit. Ajoraluartumik Covid-19-ip tamanna ajornartilaarsimavaa, kisianni massakkut siumut neriuuteqalernarpoq.

NAIA-mi iluaqutaasut iluaagisaasinnaasullu aamma apeqqutigaagut:
“Fullservice atornerusarparput umiarsuarnut inniminniiniaraangatta, naatsorsuutilerinermi uagutsinnut ajornannginnerummat. Nammineq mastercard atorlugu pisisimagaangatta naatsorsuutini nutsiterisariaqartarpugut, taamaammat umiarsuarnik inniminniinerit fullservice-ikkoortillugit iluartaqaaq.

NAIA-mi iluaagisinnaasatuarput tassaasinnaavoq meeqqanut inniminniisinnaannginnatta, taamaammat akii aaqqitsittariaqartarpagut meeqqanullu nerisassat ilanngutsittariaqartarlugit, kisianni nalunaarfigitippugut tamanna aaqqiivigineqarnissamut suliniutaasoq” Laila akivoq, aammattaarlu isumaqarluni NAIA support-ilerisut ingerlanerat ajunngitsoq inussiarnersuusullu.

Illit aamma NAIA atulersinnaavat, tassungalu Laila siunnersuuteqarpoq: “Allanut suli NAIA-mik atuilersimanngitsunut oqarsinnaavunga NAIA atoruminartuusoq sungiutipallannartuusorlu. Pingaaruteqarpoq profil-iliortarnissaq suleqativit inniminnikkatit aamma takusinnaasarniarmassuk.”