SULIFFINNUT ATATILLUGU ANGALANERIT ILISIMASAQARLUARFIGAAGUT AQQUTAA TAMAAT TOQQISSISIMATISSAVATSIGIT AIR GREENLANDIP NUNATTALU ILAGAATIGUT

Kalaallit Nunaanni Sinilluarit

Nutaarsiassanik nassiussillattaartalernitsinnut atatillugu nunatsinni unnuinissamut tunngasut aamma ikaliartuaassapput.

 

 

Ilulissani Hotel Arctic

Nunatsinni hotel-ini pitsaanerpaaq immaqalu aamma tusaamasaanerpaaq Ilulissaniippoq Hotel Arctic. 1984-mi Hotel Arctic Ilulissani illoqarfiup silataani sananeqaleqqaarmat assut illaruaatigineqarpoq. Hotel-imut ilassutit pingasut-sisamat kingorna illaruartoqarunnaarpoq.

Hotel-i sisamanik ullorialik Ilulissat illoqarfianut, sermersuup paavanut Qeqertarsuup tunuanullu isikkiviginnerpaaqarluni inisseqqavoq. Hotel Arctic hotel-ini sisamanik ullorialinni avannarpasinnerpaajuvoq, aammattaaq pisariaqartissagukku tallimanik ullorialimmik ataatsimiittarfeqarluni. Hotel-imi init, iglo-t, suite-llu 95-iusut init assigiinngissutaanut qulingiluanut immikkoortitaniipput, taamaammat ilinnut tulluartumik peqartuaannarput.

Hotel-i marlunnik nerisassanik sassaassillaqqittunik neriniartarfeqarpoq, silataanilu aneerasaarfimmi eqqissiivillutit viinnisorujuutaa seqineq kaaviinnartoq immamiittuni ilulissanut qalipaatilersuisoq isiginnaarsinnaavat. Nuannarilluinnassavat!

 

 

Hotel Sisimiut

Nunatsinniittuni illoqarfini annerpaat aappaanni Hotel Sisimiut pingaarutillit ilagaat, sulillutik angalasunut unnuisarfik pitsaalluinnartuulluni, wifi-qarluni, ataatsimiittarfeqarluni ataatsimiittarfissuaqarlunilu.

Hotel-i ininik assigiinngitsunik neqerooruteqarpoq, Business suite-t ilanngullugit Nasaasamut, illoqarfimmut immammullu isikkivigissut. Business suite-t init marluk ataatsimoortillugit inissinnikuupput, sinittarfeqarluni atisaasivittalik nerrivittalillu, inilu sofaqarluni nerrivillu issiavittalik.

Init tamarmik akeqanngitsumik wifi-qarput nutaalianillu fjernsyneqarlutik tv-mut radio-mullu kanalit arlalinnut atassuteqartumik. Inini te kaffelu sananeqarsinnaapput, ullaakkorsiornissarlu ilaareerluni Brasserie & Restaurant Nasaasami sassaalliutigineqartarluni, tassanittaaq nuannersumik imerniartarfeqarpoq,

Silataani marlunnik boblebad-eqarpoq, pisuttuareernerup sisorareernerulluunniit kingorna nuannersumik kissalaarfigisinnaasarnik.
Nunatsinni illoqarfiit pissaganarnerit ilaannut suliartussaguit, Hotel Sisimiut qinigassatsialaavoq.

 

 

Best Western Hotel Ilulissat

Hotel Ilulissat, sisamanik ullorialik, juni-mi 2021 ammarpoq. Ilulissani illoqarfiup qeqqani inisseqqavoq mittarfimmiit mittarfimmullu ingerlassinissamut neqeruussallutik. Ataatsimiiffissanut periarfissaqarluassaaq. Neriniartarfik, imerniartarfittallik, qullerpaami aneerasaartarfiup saniani nassaarisinnaavat. Uani ullaakkorsiornerit, ullup qeqqasiornerit, unnukkorsiornerit, kaffi, imeruersaatit kaagillu sassaalliutigineqassapput.

Init 78-iusut imatut inissinneqarput; suite-t marluk, superior-it 16-t, executive-t 18-t, init naliginnaasut 30-t, init ilaqutariinnut 12-t. Init tamarmik marluuttarissanik siniffeqassapput, ilaqutariillu inaanni aamma quleriaanik siniffeqassalluni.

Hotel Ilulissat nutaalianik ataatsimiittarfeqassaaq, init arfineq marluusunik pisatarissaartunik ataatsimiittarfeqassalluni.

Hotel Angmagssalik

Nunatsinni isikkiviit Hotel Ammassalimmiit isikkivittut takorannertigisut ikittuinnaapput. Akunnittarfimmut aqqutaata qummukajaajungaatsiarnera nassuerutigerusupparput, tamannali imminut akilersinnaalluarpoq (akunnittarfiup busseeraanut ilaallutit aamma tappavunnarsinnaavutit).

Akunnittarfik immikkoortunik assigiinngitsunik 40-inik initaqarpoq, tassani (akiliilluni atorneqarsinnaasumik) wifi -eqarpoq pitsaasumillu neriniartarfeqarluni.

Akunnittarfiup isersimaartarfia nutartigaq alutornarluni qangamut eqqaanarpoq koorbunillu filmiliami ilaasutut misigisinnaassaatit. Isersimaartarfiit alianaatsut inillu kusanartut eqqaassanngikkaanni akunnittarfik isikkivissua alutornarluinnartumik aneerasaartarfaqeqarpoq. Tasiilaq kangerliumanermi alianaatsumi qaqqarsuarnit inngilinnit ungaluneqarsimasumi inissisimavoq. Isikkiviinnaaluunniit ilumut periarfissagissaarneruvoq akunnittarfimmilu iluarusunnissat suliniutigineqarluni.

Hotel Angmagssalik tassatuaavoq nunatsinni akunnittarfiit namminersortumik pigineqartumik takornariartitsilluni angallassinernut atugassiamik qulimiguulimmik pigisaqartoq.

Hotel Avannaa Sømandshjem-iuvoq

Sullitatta arlaliisa nunatsinniittut Sømandshjem-it atornissai nuannarivaat, Hotel Avannaalu taakkununnga ilassutaanikuulluni. Tassa isumaqarpoq sinneqartoorutaasut tamarmik nunatsinni Danmark-imilu aalisartunut imarsiortunullu atugarissaarnerunissamut suliniutunut atorneqassallutik.

Hotel Avannaa Ilulissani illoqarfiup silatinnguani inissisimavoq. Hotel-imi persuarsiorfiunngitsumik misigisimasaqartitserusuttarput, nutaamillu kaffeqartuaannarluni!

Hotel-i marluuttarissanik 21-nik ineqarpoq, ataasiakkaatut atorneqarsinnaasunik, aammattaaq ataatsimik penthouseqarput inissaqarluarnissamik pisariaqartitsissaguit.

Init tamarmik silataaniit immikkut isaariaqarput, illoqarfimmullu isikkivigilluarlutik.

Hotel Maniitsoq

Hotel Maniitsoq talittarfiup qulaani immamut isikkivigilluni inissisimalluaqqavoq. Hotel-p neriniartarfiani nerisassat mamartut angalaqatit peqatigalugit unnussiorluarlutit nerilluarsinnaallutit. Init ajunngilluartut pujortarfiunngitsut 21-iupput. Init immikkut uffarfittaqarput 32”-imillu fjernsyneqarlutik satellitsikoortunik kanal-eqartumik.
Hotel-i tamakkerlugu wifi-qarpoq. Hotel Maniitsoq ataatsimiittarfeqarluarpoq, inunnut 30-t tungaanut kursusertarfeqarlutik imaluunniit inuit 60-t tungaanut ataatsimiitsitsisinnaallutik.